ပညာရေး, အထွေထွေသိမှတ်စရာ

ဆွဲကြိုးနှင့်ပတ်သက်သောပညာဗဟုသုတ

U Hton Necklace Measurement

ရတနာပစ္စည်းတွေထဲမှ လည်ဆွဲရတနာ ကိုတော့ မြန်မာအမျိုးသမီးတွေတော်တော်များများက တန်ဖိုးထားပြီး မြတ်မြတ်နိုးနိုး ဝတ်ဆင်တတ်ကြပါတယ်။ လည်ဆွဲရတနာလေးတွေဟာ  အမျိုးသမီးတို့ရဲ လည်တိုင်ကို ကြော့ရှင်း  စေပြီး အလှကျက်သရေကို တိုးစေပါတယ်။ မိတ်ဆွေအပေါင်းအသင်းတွေနဲ့ လူအများတကာရဲ့ အလယ်မှာ လည်း တင့်တယ်ပြီး ဂုဏ်ရှိစေပါတယ် ။ ဒါကြောင့်  အမျိုးသမီးတွေရဲ့ ကျက်သရေဆောင်ပစ္စည်းဟာ လည်ဆွဲရတနာပဲဖြစ်ပါတယ်။ ဒါပေမယ့် ကိုယ်နဲ့လိုက်ဖက်မယ့် လည်ဆွဲပုံစံလေးတွေကို မှန်မှန်ကန်ကန်နဲ့  ရွေးချယ်နိုင်ဖို့ကလည်း အရေးကြီးတဲ့အချက်ပဲဖြစ်ပါတယ်။ ဒါဆို ဘယ်လိုလည်ဆွဲမျိုးတွေက ကိုယ်နဲ့ လိုက်ဖက်မလဲဆိုတာ သိထားဖို့ လိုမယ်နော်။ အခုပြောပြပေးသွားမဲ့ အကြောင်းအရာတွေကို ကြည့်ပြီး ကိုယ်နဲ့ လိုက်ဖက်ညီမဲ့ လည်ဆွဲကို ရွေးချယ်နိုင်သွားမှာပဲ ဖြစ်ပါတယ်။

လည်ဆွဲအရွယ်အစားများ
–           အရွယ်ရောက်ပြီး အမျိုးသမီးတွေအတွက် လည်ဆွဲအရွယ်အစားတွေကတော့ ၁၄လက်မ ကစပြီး ၃၆လက်မထိ ရှိပါတယ်။ ယေဘုယျအားဖြင့် ဘယက်အတွက်ကတော့ ၁၅လက်မနဲ့၁၆လက်မ ဖြစ်ပြီးတော့ လည်ပတ်အတွက်ကတော့ ၁၄လက်မ ဖြစ်ပါတယ်။
–           အရွယ်ရောက်ပြီး အမျိုးသားတွေအတွက် လည်ဆွဲအရွယ်အစားတွေကတော့ ၁၈လက်မကနေ ၃၆လက်မ ဖြစ်ပါတယ်။
–           ကလေးအရွယ်ကတော့ ၁၂လက်မကနေ ၁၄လက်မထိ ဝတ်ဆင်တတ်ကြပါတယ်။

အများဆုံးဝတ်ဆင်တတ်ကြသည့်လည်ဆွဲအရွယ်အစားများ
–           ခန္ဓာကိုယ် ပုံမှန်ရှိသောအမျိုးသမီးအများစုကတော့ ၁၇လက်မနဲ့၁၈လက်မကိုဝတ်ဆင်လေ့ရှိပြီး ခပ်ပြည့်ပြည့်ရှိသော အမျိုးသမီးလေးတွေကတော့ ၂၀လက်မကနေ ၂၂လက်မကို ဝတ်ဆင်တတ်ကြပါတယ်။ ၂၂လက်မကနေ ၃၆လက်မအတွင်းကိုတော့ ဖန်စီဆွဲကြိုးအဖြစ်ဝတ်ဆင်ကြပါတယ်။
–           ပုံမှန်အမျိုးသားအများစုကတော့ ၁၈ လက်မကနေ ၂၂ လက်မအထိ ဝတ်ဆင်ပြီးတော့ အနည်းငယ်ဝသောအမျိုးသားများကတော့ ၂၃လက်မကနေ၂၅လက်မထိဝတ်ဆင်ကြပါတယ်။၂၅လက်မကနေ ၃၆လက်မအတွင်းကိုတော့ ဖန်စီဆွဲကြိုးအဖြစ် ဝတ်ဆင်ကြပါတယ်။

ကိုယ်နှင့်လိုက်ဖက်သောဆွဲကြိုးရွေးချယ်မှု
–           သင်ဟာ လည်ပင်းရှည်သူတစ်ယောက်ဖြစ်ပါက ခန့်ငြားသောဆွဲကြိုးရှည်ရှည်နဲ့ရော ဆွဲကြိုးအတိုတွေနဲ့ပါလိုက်ဖက်ပါတယ်။ ဒါတင်မကပဲ ဘယက်အမျိုးမျိုးနဲ့ပါ လိုက်ဖက်ပြီးတော့ အလှကျက်သရေရှိစေမှာပဲဖြစ်ပါတယ်။ သို့ပေမဲ့ ဆွဲကြိုးမျှင်သေးသေးလေးတွေနဲ့တော့ မလိုက်ဖက်ပါဘူး။
–           သင်ဟာလည်ပင်းတိုပြီး မျက်နှာဝိုင်းရင်တော့ ဆွဲကြိုးသေးသေးမျှင်မျှင်လေးတွေကို လည်ကပ်အနေအထား ၁၅လက်မ ၁၆လက်မလေး တွေထားပြီး ဝတ်မယ်ဆိုရင် အလှတိုးစေပြီး မျက်နှာပွင့်လန်းစေမှာဖြစ်ပါတယ်။
–           ရင်သားကြီးပြီး မျက်နှာလေးထောင့်ပိုင်ရှင်တွေကတော့ ဆွဲကြိုးအရှည်နဲ့မလိုက်ဖက်ပါဘူး။သို့ပေမဲ့ ရင်ညွန့်မှာ လော့ကပ်ရှိတဲ့အနေအထား ၁၆လက်မ၊၁၇လက်မ ဆိုရင်တော့ ကျက်သရေရှိတဲ့အလှကို ပိုင်ဆိုင်နိုင်မှာပဲဖြစ်ပါတယ်။
–           ရင်သားပြားပြီး မျက်နှာရှည်တဲ့သူတွေကတော့ ဆွဲကြိုးရှည်ရှည်နဲ့ရော ဖန်စီဝတ်လို့ရတဲ့ ၃၆လက်မ ရှိတဲ့ဆွဲကြိုးအရှည်ကြီးတွေ ချက်ရောက်တဲ့ထိ ဝတ်ဆင်ကာ အထာကျပြီး လန်းနေမှာဖြစ်ပါတယ်။
ဒီလောက်ဆိုရင်တော့ ကိုယ်နဲ့လိုက်ဖက်ညီမဲ့ ဆွဲကြိုးများကို မှန်ကန်စွာ ရွေးချယ်နိုင်ပြီး အလှကျက်သရေများ တိုးပွားနိုင်ကြမှာပါ။ အားလုံးပဲ အဆင်ပြေစွာ ရွေးချယ်ဝယ်ယူနိုင်ကြပါစေ။

0/5 (0 Reviews)